سیوریج کے پانی سے نیو سبزل روڈ میں مزید 70 ایکڑ سے زائد اراضی پر کاشت کردہ مضر صحت خوردنی فصلیں تلف کردی گئیں ۔
تلف کردہ سبزیوں میں دھنیا ، گوبھی ، پودینہ اور سلاد کی فصلیں شامل تھیں۔
بی ایف اے کے جاری مہم کے دوران اب تک تقریباً 250 ایکڑ اراضی پر سیوریج کے پانی سے کاشت کردہ مختلف سبزیاں تلف کی جا چکی ہیں۔
یاد رہے کہ سیوریج کے زہریلے پانی سے تیار سبزیاں انسانی صحت کیلئے انتہائی مضر ہیں ۔
ماہرین کے مطابق سیوریج کے پانی سے تیار کردہ سبزیوں میں آرسینک ، سلفر اور دیگر کیمیکلز انسانی صحت کیلئے انتہائی خطرناک ہوتے ہیں۔
ایسی سبزیاں ہڈیوں ، جگر ، گردوں اور دل کے امراض کا باعث ہوسکتی ہیں ۔
ڈائریکٹر جنرل بلوچستان فوڈ اتھارٹی محمد نعیم بازئی کا اس سلسلے میں کہنا ہے کہ کاشتکاران و زمینداروں کو بارہا بتایا گیا ہے کہ سیوریج کے پانی سے صرف غیر خوردنی فصلیں ہی کاشت کی جا سکتی ہیں۔
عدالت عالیہ کے فیصلوں کی روشنی میں انسانی صحت کیلئے مضر سبزیوں کے مکمل تدارک کیلئے بی ایف اے کی کارروائیاں جاری رہیں گی
